தமிழ்த்துறை

General English (I and II) and AO List

Tamil dept General Tamil and NME students - Shift II

ADMISSIONS (2025-2026)

Application Portal for UG courses will be opened two days prior to the release of TN State Board Plus Two results.

HOD's Message

தமிழ்த்துறை

சிறப்புமிகு இயேசு சபையினரால் 1925 இல் தொடங்கப்பெற்ற புகழ்மிகு இலயோலா கல்லூரியில் மொழிப்பாடம் வழங்கிட தமிழ்த்துறை தோற்றுவிக்கப்பட்டது. 1969 ஆம் ஆண்டு இளங்கலை சிறப்புத்தமிழ்ப் பாடப்பிரிவு தொடங்கப்பெற்றது. 1978 ஆம் ஆண்டில் தன்னாட்சித் தகுதிப் பெற்றவுடன் தமிழ்த்துறைப் பாடத்திட்டங்கள் மாற்றிய அமைக்கப்பட்டன. தத்துவ போதகர் தமிழ் இலக்கியமன்றம், இனிகோ தமிழ்ப்பேரவை, வீரமாமுனிவர் தமிழ்ப்பேரவை என மூன்று அமைப்புகள் மாணவர்களின் தமிழுணர்வை வளர்க்கும் நோக்கில் இயங்கி வருகின்றன. பல்வகையான போட்டிகள், கருத்தரங்குகள் மற்றும் செயலரங்குகள், அறக்கட்டளைச் சொற்பொழிவுகளின் வாயிலாக மாணவர்களுக்கு இலக்கிய சமூகச் செய்திகள் கொண்டு சேர்க்கப்படுகின்றன.

1978 ஆம் ஆண்டு தமிழ்ப்பேரவை விழாவில் சிலம்புச் செல்வர் மா.பொ. சிவஞானம், தவத்திரு குன்றக்குடி அடிகளார், திரைப்பட இயக்குனர் திரு. கோவி. மணிசேகரன், கலைவேந்தன் திரு.கி.வா. ஜகந்நாதன் ஆகியோர் சிறப்புச் சொற்பொழிவாற்றினர். 1981 ஆம் ஆண்டு திரைக்கலை மன்றத்தின் தொடக்க விழாவில் திரைப்படக் கல்லூரி முதல்வர் இயக்குநர் ப.நீலகண்டன் அவர்கள் தலைமையில் இயக்குநர் மகேந்திரன், ஒளிப்பதிவாளர் அசோக்குமார், நடிகர் செந்தாமரை ஆகியோர் சிறப்பு விருந்தினர்களாக வந்திருந்தனர். 1984 ஆம் ஆண்டு துறைத்தலைவர் முனைவர் க.ப. அறவாணன், தமிழில் 'வங்கி விதிமுறைகளின் சொற்களஞ்சியத்தை' வெளியிடுவதில் ஆற்றிய சேவைகளுக்காக தமிழக முதலமைச்சரால் கௌரவிக்கப்பட்டார்.

மாணவர்களின் திறமைகளைத் தொடக்கத்திலேயே தட்டி எழுப்புவது இன்றியமையாததாகும். அதற்காக 1983 ஆம் ஆண்டு துறைத்தலைவர் பேரா. ச.பா. அருளானந்தம் தலைமையில் "வியாழன் விருந்து" என்ற அமைப்பை உருவாக்கி, மாணவர்கள் கருத்துப் போரிட்டனர். அது 1986 ஆம் ஆண்டு மாணவர்களின் சிந்தனைத்திறனை உயர்த்தும் புதன் வட்டம் என்னும் அமைப்பாக மாறியது. 2024 ஆண்டு முதல் அது வாசகர் வட்டமாக உருவாகி நடைபெற்றுக் கொண்டிருக்கிறது.

இயல் தமிழ் உரை
துறைத்தலைவர் பேராசிரியர் எம்.ஆர் அடைக்கலசாமி அவர்கள் தலைமையில் 1991 ஆம் ஆண்டின் தமிழ்ப் பேரவைவிழாவில் தமிழக அரசுப் பண்பாட்டுத் துறைச்செயலர் அவ்வை நடராசன் சிறப்புரை ஆற்றினார். ‘தமிழ் மருத்துவம் நமது கருவூலம்' என்னும் தலைப்பில் மூலிகைக் கண்காட்சியும் கருத்தரங்கமும் முனைவர் செ. தனராசு அவர்களுடைய தலைமையில் மருத்துவர் அனந்தக்கண்ணன், மருத்துவர் நெ. தெய்வநாயகம், மருத்துவர் சி. எஸ். ரெக்ஸ் சற்குணம், மருத்துவர் தே. வேலாயுதம் ஆகியோர் ஆய்வுரை நிகழ்த்தினர். 04-03-2010 அன்று கவிப்பேரரசு வைரமுத்து பங்கேற்ற 'தண்ணீர் தேசம் என்னும் புதினப் பயிலரங்கம் நடைபெற்றது.

தமிழ்த்துறை நிகழ்த்திய கருத்தரங்குகள்
தமிழ்த்துறையின் முதல் பன்னாட்டுக் கருத்தரங்கம் 2007ஆம் ஆண்டு முனைவர் செ. தனராசு தலைமையில் தாய்மொழிவழிக் கல்வி குறித்த பொருண்மையில் நிகழ்ந்தது. முனைவர் இராசராசன் தலைமையில் 2008ஆம் ஆண்டு அண்ணா நூற்றாண்டுக் கருத்தரங்கும் 2009ஆம் ஆண்டு இயேசு சபைத்துறவிகளின் தமிழ்ப்பணி என்ற கருத்தரங்கும் 2011ஆம் ஆண்டு இலக்கியத்தில் மனிதநேயம் என்ற கருத்தரங்கும் சிறப்புற நிகழ்ந்தன. கருத்தரங்க கட்டுரைகள் நூல்களாக வெளியிடப்பட்டன.

செம்மொழிக் கருத்தரங்கம்
செம்மொழித் தமிழாய்வு மத்திய நிறுவனத்துடன் இணைந்து 'தமிழ்ச் செவ்வியல் இலக்கியங்களில் உரையாடல்களும் மனித உறவு மேம்பாடும்' என்ற தலைப்பில் 2010ஆம் ஆண்டு தமிழ்த்துறை நிகழ்த்திய மூன்று நாள் கருத்தரங்கங்கில் சென்னைப்பல்கலைக்கழகத் துணைவேந்தர் திருமிகு திருவாசகம், கவிஞர் ஈரோடு தமிழன்பன், முனைவர் க.ப. அறவாணன் மற்றும் செம்மொழி இயக்குனர் பேரா. இராமசாமி ஆகியோர் கலந்து கொண்டனர். செம்மொழித் தமிழாய்வு மத்திய நிறுவனத்துடன் இணைந்து 'தமிழ்ச் செவ்வியல் இலக்கியங்களில் வாழ்வியல் நெறிகள்' என்ற தலைப்பில் 2013ஆம் ஆண்டு தமிழ்த்துறை நிகழ்த்திய மூன்று நாள் கருத்தரங்கங்கில் முனைவர் இ. சுந்தரமூர்த்தி, முனைவர் மறைமலை இலக்குவனார், முனைவர் மு. சுதந்திரமுத்து, முனைவர் மா.ரா.அரசு, மற்றும் முனைவர் ப.மகாலிங்கம் ஆகியோர் கலந்து கொண்டனர். முனைவர் சி.அ. இராசராசன் தலைமையில் இக்கருத்தரங்கங்களின் ஒருங்கிணைப்பாளராக முனைவர் எல். சூசை சகாயராஜா சிறப்பாக செயல்பட்டார். கருத்தரங்க கட்டுரைகள் நூல்களாக வெளியிடப்பட்டன. செம்மொழித் தமிழாய்வு மத்திய நிறுவனத்துடன் இணைந்து 'தொல்காப்பிய மரபும் சங்க நூல்களும்' என்ற தலைப்பில் 2014ஆம் ஆண்டு தமிழ்த்துறை நிகழ்த்திய மூன்று நாள் கருத்தரங்கங்கில் முனைவர் ஔவை நடராசன், சென்னை மண்டல இணை இயக்குனர் முனைவர் ரவிசங்கர், உயர்கல்வி மன்றத்தின் உறுப்பினர் செயலர் முனைவர் கரு.நாகராசன் மற்றும் முனைவர் மு.முத்துவேலு கலந்துகொண்டனர். முனைவர் சூ.அ. செல்வநாதன் தலைமையில் கருத்தரங்க ஒருங்கிணைப்பாளராக முனைவர் எல். சூசை சகாயராஜா சிறப்பாக செயல்பட்டார். கருத்தரங்க கட்டுரைகள் நூலாக வெளியிடப்பட்டது.

முனைவர் சூ. அ. செல்வநாதன் தலைமையில் 2015 ஆம் ஆண்டு தமிழ்த்தூது தனிநாயகம் அடிகளாரின் நூற்றாண்டு விழாக் கருத்தரங்கம் நடைபெற்றது. 2016 ஆம் ஆண்டில் பன்முகப் பார்வையில் திருக்குறள் எனும் பொருண்மையில் கருத்தரங்கம் நிகழ்ந்தது. பேரா. ஞானயுவராஜ் கருத்தரங்க ஒருங்கிணைபாளராக சிறப்பாக செயல்பட்டார். முனைவர் அ. டேனியல் தலைமையில் முனைவர் சூ. அமல்ராஜ் ஒருங்கிணைப்பில் 2017ஆம் ஆண்டு கிறித்தவமும் தமிழும் என்ற தலைப்பில் நடந்த கருத்தரங்கில் திருமிகு பீட்டர் அல்போன்ஸ் முனைவர் அறவாணன் ஆகியோர் வாழ்த்துரை வழங்கினார். 2018ஆம் ஆண்டு செந்தமிழ்ச் சொற்பிறப்பியல் அகரமுதலித் திட்ட இயக்ககத்துடன் இணைந்து நடத்திய அகராதியியல் பன்னாட்டுக் கருத்தரங்கில் அரசுச் செயலாளர் திரு. இரா.வெங்கடேசன் இ.ஆ.ப இயக்குநர் அகரமுதலித் திட்ட இயக்ககம், திரு. தங்க காமராசு ஆகியோர் வாழ்த்துரை வழங்கினார். முனைவர் து. மேரி சொர்ணாம்பாள் தலைமையில் சிந்துவெளிமுதல் கீழடி வரை அகழ்வாய்வு கருத்தரங்கம் 2019இல் நடைபெற்றது. முனைவர் சூ. அமல்ராஜ் கருத்தரங்க ஒருங்கிணைபாளராகச் செயல்பட்டார்.

முனைவர் சூ. அமல்ராஜ் தலைமையில் 2022 முதல் தமிழ்த்துறை இன்னும் இளமையுடன் புதுப்பாய்ச்சலுடன் திறம்பட செயல்பட்டு வருகின்றது. 2022ஆம் ஆண்டில்”இனிகோ மனமாற்றம்” 500ஆவது ஆண்டு என்ற தலைப்பில் சிறப்புக் கருத்தரங்கம், அறம் பதிப்பகத்துடன் இணைந்து சிறப்புக் கருத்தரங்கம், மற்றும் சாகித்ய அகாதமியுடன் இணைந்து “அகிலனின் படைப்புகள், போன்ற கருத்தரங்கங்கள் நடத்தப்பட்டன. 2023 ஆம் ஆண்டு பன்முகப்பார்வையில் கிறித்துவ இலக்கியம் என்ற பொருண்மையில் பன்னாட்டுக் கருத்தரங்கம் நிகழ்ந்தது. முனைவர் சூ. அமல்ராஜ் தலைமையில் முனைவர் எல். சூசை சகாயராஜா கருத்தரங்க ஒருங்கிணைப்பாளராகச் செயல்பட்டார். இக்கருத்தரங்க கட்டுரைகள் நூல்களாக வெளியிடப்பட்டன.

ஆழ்வார்கள் ஆய்வு மையத்துடன் இணைந்து 2024ஆம் ஆண்டில் ”பன்முகப்பார்வையில் கலைஞரும் படைப்புகளும்” என்ற தலைப்பில் நடத்திய கலைஞர் நூற்றாண்டுச் சிறப்புக் கருத்தரங்கில் தமிழக அரசு சார்பில் மாண்புமிகு அமைச்சர் துரைமுருகன், மாண்புமிகு மக்களவை உறுப்பினர் திரு. ஜெகத்ரட்சகன்ஆகியோர் கலந்து கொண்டு சிறப்புரை ஆற்றி நூலினை வெளியிட்டனர். மாண்புமிகு சட்டப்பேரவை சபாநாயகர் அப்பாவு அவர்கள் தலைமையில் நடந்த மாநில அளவிலான கலைஞர் நூற்றாண்டு சிறப்புப் பேச்சுப் போட்டியில் தமிழ்த்துறை மாணவர்கள் முதல் மூன்று பரிசுகளைப் பெற்றனர். முனைவர் சூ. அமல்ராஜ் தலைமையில் முனைவர் எல். சூசை சகாயராஜா கருத்தரங்க ஒருங்கிணைப்பாளராகச் செயல்பட்டார். 2024-2025ஆம் கல்வியாண்டில்”இருபதாம் நூற்றாண்டு தமிழக இயேசு சபையாரின் தமிழ்ப்பணிகளும் சமூகப்பணிகளும்”என்ற தலைப்பில் கருத்தரங்கம் நடத்தப்பட்டது. துறைத்தலைவர் முனைவர் சூ. அமல்ராஜ் தலைமையில் முனைவர் ஜெயப்பிரகாஷ் ரத்தின தியாகு கருத்தரங்க ஒருங்கிணைப்பாளராகச் செயல்பட்டார். இக்கருத்தரங்களின் கட்டுரைகள் நூல்களாக வெளியிடப்பட்டன.

தமிழ்த்துறையில் நிறுவப்பட்டுள்ள அறக்கட்டளைகள்
* முதுமுனைவர் அருள்தந்தை இராசமாணிக்கனார், சே. ச. அறக்கட்டளை
* முனைவர் ந. சுப்புரெட்டியார் அறக்கட்டளை
* கி. வா. ஜகந்நாதன் அறக்கட்டளை
* தமிழ்ப்பண்பாட்டு மன்றம் அறக்கட்டளை
* எஸ்தர் ராஜம்மாள் அறக்கட்டளை
*2023-24 காலகட்டத்தில் முனைவர் அருணை பாலறாவாயன், முனைவர் ப. ஆறுமுகம் அறக்கட்டளைகள் நிறுவப்பட்டன.

முனைவர் சூ. அமல்ராஜ் தலைமையில் 2023-2024 ஆம் ஆண்டின் அறக்கட்டளைச் சொற்பொழிவுகள் அருந்தமிழ் வளர்த்த ஆறு சமயங்கள் என்ற பொருண்மையில் இரண்டு நாள் நிகழ்வுகளாக நடந்தேறின. 2024-2025 ஆம் ஆண்டின் அறக்கட்டளைச் சொற்பொழிவுகள் தீந்தமிழ் ஈந்த தேம்பாவணி என்ற பொருண்மையில் இரண்டு நாள் நிகழ்வுகளாக நடந்தேறின. முனைவர் எல். சூசை சகாயராஜா அறக்கட்டளைச் சொற்பொழிவுகளின் ஒருங்கிணைப்பாளராகச் செயல்பட்டார். பல்வேறு தமிழ் அறிஞர்களிடம் கட்டுரைகள் பெறப்பட்டு அவை நூல்களாக வெளிடப்பட்டன.

இத்துறையில் பயின்ற மாணவர்கள் பலரும் ஆசிரியர்களாகவும் கல்லூரிப் பேராசிரியர்களாகவும் திரைப்படக் கலைஞர்களாகவும் தொலைக்காட்சித் துறையிலும் விளையாட்டுத்துறையில் சிறப்புறச் செயலாற்றுபவர்களாகவும் இதழியல் வல்லுநர்களாகவும் காவல்துறைப் பணியாளர்களாகவும் பன்முகத் திறமைகொண்டு சமுதாய வளர்ச்சிக்கும் உயர்விற்கும் தங்கள் உழைப்பை நல்கி வருகின்றனர்.

தமிழ்த்துறை – ஆளுமைகள்:
தமிழ்த்துறைத் தலைவர்களாக, அருட்தந்தை இராசமாணிக்கனார், சே.ச., அருட்தந்தை வி,மி. ஞானபிரகாசம்,சே.ச., பேரா. வளவன் பாண்டியன், முனைவர் அருள்சாமி, முனைவர் க.ப. அறவாணன், முனைவர் ச.பா. அருளானந்தம், பேரா. அடைக்கலசாமி, பேரா. த. சாமுவேல், முனைவர் அருணை பாலறாவாயன், முனைவர் ப. ஆறுமுகம், முனைவர் செ. தனராசு, முனைவர் சி.அ. இராசராசன், முனைவர் சூ.அ. செல்வநாதன், முனைவர் அ. டேனியல், முனைவர் து. மேரி சொர்ணாம்பாள் ஆகியோர் பணியாற்றியுள்ளனர். 2022 ஆம் ஆண்டு முதல் முனைவர் சூ. அமல்ராஜ் தலைமையில் தமிழ்த்துறை சிறப்புடன் இயங்கி வருகின்றது.

மனோன்மணீயம் பெ. சுந்தரனார் தமிழை, ' உன் சீரிளமைத்திறம் வியந்து செயல் மறந்து வாழ்த்துதுமே ' என்று பாடிய கனவைத் தமிழ்த்துறை நனவாக்கிக் வருகிறது.

SYLLABUS

Learning Outcomes Based Curriculum Framework (LOCF) for UG Tamil (2019 Restructuring)

Question Papers

2025-2026

2022-2023

2022-2023

Books and Publications